პროექტი "MI RACULUM"

საყოველთაო პანდემიისა და მისგან გამოწვეული პრობლემების ფონზე საკმაოდ რთული აღმოჩნდა მუშაობა და მით უმეტეს სიახლის გამოკვეთა თუ იდეების შეთხზვა, მაგრამ მეორე მხრივ სწორედ ეს ნაბიჯები იყო საჭირო უარყოფითი ენერგიის დადებითად ქცევისათვის. კონსერვატორია, თავისი სტუდენტებითა და ლექტორებით, ჩემი აზრით, ერთ-ერთი თვალსაჩინო მაგალითი აღმოჩნდა სწორედ ხსენებული ენერგიის მუდმივობისა. დისტანციური სწავლების რეჟიმში მთავარი მიღწევა, რა თქმა უნდა, სწავლის არჩავარდნა იყო, რისთვისაც ერთნაირად უნდა ვუმადლოდეთ ლექტორების შემართებასა და ჩვენგან, სტუდენტებისგან აქტიურ ჩართულობასაც. ამ უკვე დიდ მიღწევას რამდენიმე განსაკუთრებული პროექტიც დაემატა, როგორებიცაა ჩვენი ბლოგის - „Opus 2-ის“ რეალიზება, ყოველწლიური სტუდენტური კონფერენცია- 2020, რომლის მონაწილეთა რაოდენება წელს უჩვეულოდ დიდი იყო და პროექტი „MI RACULUM“, რომელიც ერთგვარი გვირგვინი იყო ბოლო სემესტრისა.

პროექტ „MI RACULUM“-ის უმთავრესი მიზანი ქართული მუსიკის პოპულარიზაციაა და ამ საქმეში, რასაკვირველია, თითოეული ჩვენგანი უნდა იყოს ჩართული. პროექტის ავტორია მუსიკის ისტორიის კათედრის ასოცირებული პროფესორი: გვანცა ღვინჯილია, ტექნიკურად კი პროექტი უზრუნველყო საშემსრულებლო ფაკულტეტის IV კურსის სტუდენტმა და IT დეპარტამენტის თანამშრომელმა: ნოდარ მდივანმა. რაც შეეხება უშუალოდ პროექტის პირველი ეტაპის მასალას, იგი მოიცავს 5 ვიდეორგოლს. მათში კონსერვატორიის საშემსრულებლო ფაკულტეტის სტუდენტები, რომლებიც თავად ასრულებენ ქართველ კომპოზიტორთა ნაწარმოებებს, ან მომავალში აპირებენ რეპერტუარის გამდიდრებას ეროვნული მუსიკით, საუბრობენ ქართველი კომპოზიტორებისა და მათი ნაწარმოებების შესახებ, გვიზიარებენ უშუალო შთაბეჭდილებებს. ამ ეტაპზე მონაწილეობა მიიღეს საშემსრულებლო ფაკულტეტის სტუდენტებმა: ელენე ვეფხვაძემ, კონსტანტინე ეროიანმა, სოფიო ძიძიგურმა, სალომე მერაბიშვილმა და ნატალია ჩარკვიანმა. პროექტის მონაწილეები მიწვეულიყვნენ ტელე-რადიო გადაცემებში “კლასიკა ყველასთვის“, „პიკის საათი“ და „შენი დილა“.

დიდ მადლობას ვუხდით და წარმატებას ვუსურვებთ ბლოგის სახელით პროექტის ავტორებს, მონაწილეებსა და ყველა გვერდში მდგომს. ჩვენ კი ის დაგვრჩენია ამ წამოწყებას ფეხი ავუბათ და ყველანაირად შევუწყოთ ხელი ქართული მუსიკის პოპულარიზაციას.

გთავაზობთ პროექტის ფარგლებში ჩაწერილ ვიდეოებს:

ელენე ვეფხვაზე - (ჩასაბერი საკრავები, ფლეიტა) - სულხან ნასიძის სიმფონია „ფიროსმანი“. (ვიდეო კონსერვატორიის facebook გვერდზე) (ვიდეო MI RACULUM-ის YouTube არხზე)

კონსტანტინე ეროიანი, (სიმებიანი საკრავები, ვიოლინო) - სულხან ცინცაძის საკვარტეტო მინიატურები. (ვიდეო კონსერვატორიის facebook გვერდზე) (ვიდეოს MI RACULUM-ის YouTube არხზე)